Romains 8.4
Vulgate

La vie animée par l’Esprit

¹ nihil ergo nunc damnationis est his qui sunt in Christo Iesu qui non secundum carnem ambulant
² lex enim Spiritus vitae in Christo Iesu liberavit me a lege peccati et mortis
³ nam quod inpossibile erat legis in quo infirmabatur per carnem Deus Filium suum mittens in similitudinem carnis peccati et de peccato damnavit peccatum in carne
⁴ ut iustificatio legis impleretur in nobis qui non secundum carnem ambulamus sed secundum Spiritum
⁵ qui enim secundum carnem sunt quae carnis sunt sapiunt qui vero secundum Spiritum quae sunt Spiritus sentiunt
⁶ nam prudentia carnis mors prudentia autem Spiritus vita et pax
⁷ quoniam sapientia carnis inimicitia est in Deum legi enim Dei non subicitur nec enim potest
⁸ qui autem in carne sunt Deo placere non possunt
⁹ vos autem in carne non estis sed in Spiritu si tamen Spiritus Dei habitat in vobis si quis autem Spiritum Christi non habet hic non est eius
¹⁰ si autem Christus in vobis est corpus quidem mortuum est propter peccatum spiritus vero vita propter iustificationem
¹¹ quod si Spiritus eius qui suscitavit Iesum a mortuis habitat in vobis qui suscitavit Iesum Christum a mortuis vivificabit et mortalia corpora vestra propter inhabitantem Spiritum eius in vobis
¹² ergo fratres debitores sumus non carni ut secundum carnem vivamus
¹³ si enim secundum carnem vixeritis moriemini si autem Spiritu facta carnis mortificatis vivetis
¹⁴ quicumque enim Spiritu Dei aguntur hii filii sunt Dei
¹⁵ non enim accepistis spiritum servitutis iterum in timore sed accepistis Spiritum adoptionis filiorum in quo clamamus Abba Pater
¹⁶ ipse Spiritus testimonium reddit spiritui nostro quod sumus filii Dei
¹⁷ si autem filii et heredes heredes quidem Dei coheredes autem Christi si tamen conpatimur ut et conglorificemur
¹⁸ existimo enim quod non sunt condignae passiones huius temporis ad futuram gloriam quae revelabitur in nobis
¹⁹ nam expectatio creaturae revelationem filiorum Dei expectat
²⁰ vanitati enim creatura subiecta est non volens sed propter eum qui subiecit in spem
²¹ quia et ipsa creatura liberabitur a servitute corruptionis in libertatem gloriae filiorum Dei
²² scimus enim quod omnis creatura ingemescit et parturit usque adhuc
²³ non solum autem illa sed et nos ipsi primitias Spiritus habentes et ipsi intra nos gemimus adoptionem filiorum expectantes redemptionem corporis nostri
²⁴ spe enim salvi facti sumus spes autem quae videtur non est spes nam quod videt quis quid sperat
²⁵ si autem quod non videmus speramus per patientiam expectamus
²⁶ similiter autem et Spiritus adiuvat infirmitatem nostram nam quid oremus sicut oportet nescimus sed ipse Spiritus postulat pro nobis gemitibus inenarrabilibus
²⁷ qui autem scrutatur corda scit quid desideret Spiritus quia secundum Deum postulat pro sanctis
²⁸ scimus autem quoniam diligentibus Deum omnia cooperantur in bonum his qui secundum propositum vocati sunt sancti
²⁹ nam quos praescivit et praedestinavit conformes fieri imaginis Filii eius ut sit ipse primogenitus in multis fratribus
³⁰ quos autem praedestinavit hos et vocavit et quos vocavit hos et iustificavit quos autem iustificavit illos et glorificavit
³¹ quid ergo dicemus ad haec si Deus pro nobis quis contra nos
³² qui etiam Filio suo non pepercit sed pro nobis omnibus tradidit illum quomodo non etiam cum illo omnia nobis donabit
³³ quis accusabit adversus electos Dei Deus qui iustificat
³⁴ quis est qui condemnet Christus Iesus qui mortuus est immo qui resurrexit qui et est ad dexteram Dei qui etiam interpellat pro nobis
³⁵ quis nos separabit a caritate Christi tribulatio an angustia an persecutio an fames an nuditas an periculum an gladius
³⁶ sicut scriptum est quia propter te mortificamur tota die aestimati sumus ut oves occisionis
³⁷ sed in his omnibus superamus propter eum qui dilexit nos
³⁸ certus sum enim quia neque mors neque vita neque angeli neque principatus neque instantia neque futura neque fortitudines
³⁹ neque altitudo neque profundum neque creatura alia poterit nos separare a caritate Dei quae est in Christo Iesu Domino nostro