Genèse 37.14
Vulgate

Histoire de Joseph

Joseph vendu par ses frères

¹ habitavit autem Iacob in terra Chanaan in qua peregrinatus est pater suus
² et hae sunt generationes eius Ioseph cum sedecim esset annorum pascebat gregem cum fratribus suis adhuc puer et erat cum filiis Balae et Zelphae uxorum patris sui accusavitque fratres suos apud patrem crimine pessimo
³ Israhel autem diligebat Ioseph super omnes filios suos eo quod in senectute genuisset eum fecitque ei tunicam polymitam
⁴ videntes autem fratres eius quod a patre plus cunctis filiis amaretur oderant eum nec poterant ei quicquam pacificum loqui
⁵ accidit quoque ut visum somnium referret fratribus quae causa maioris odii seminarium fuit
⁶ dixitque ad eos audite somnium meum quod vidi
⁷ putabam ligare nos manipulos in agro et quasi consurgere manipulum meum et stare vestrosque manipulos circumstantes adorare manipulum meum
⁸ responderunt fratres eius numquid rex noster eris aut subiciemur dicioni tuae haec ergo causa somniorum atque sermonum invidiae et odii fomitem ministravit
⁹ aliud quoque vidit somnium quod narrans fratribus ait vidi per somnium quasi solem et lunam et stellas undecim adorare me
¹⁰ quod cum patri suo et fratribus rettulisset increpavit eum pater et dixit quid sibi vult hoc somnium quod vidisti num ego et mater tua et fratres adorabimus te super terram
¹¹ invidebant igitur ei fratres sui pater vero rem tacitus considerabat
¹² cumque fratres illius in pascendis gregibus patris morarentur in Sychem
¹³ dixit ad eum Israhel fratres tui pascunt oves in Sycimis veni mittam te ad eos quo respondente
¹⁴ praesto sum ait vade et vide si cuncta prospera sint erga fratres tuos et pecora et renuntia mihi quid agatur missus de valle Hebron venit in Sychem
¹⁵ invenitque eum vir errantem in agro et interrogavit quid quaereret
¹⁶ at ille respondit fratres meos quaero indica mihi ubi pascant greges
¹⁷ dixitque ei vir recesserunt de loco isto audivi autem eos dicentes eamus in Dothain perrexit ergo Ioseph post fratres suos et invenit eos in Dothain
¹⁸ qui cum vidissent eum procul antequam accederet ad eos cogitaverunt illum occidere
¹⁹ et mutuo loquebantur ecce somniator venit
²⁰ venite occidamus eum et mittamus in cisternam veterem dicemusque fera pessima devoravit eum et tunc apparebit quid illi prosint somnia sua
²¹ audiens hoc Ruben nitebatur liberare eum de manibus eorum et dicebat
²² non interficiamus animam eius nec effundatis sanguinem sed proicite eum in cisternam hanc quae est in solitudine manusque vestras servate innoxias hoc autem dicebat volens eripere eum de manibus eorum et reddere patri suo
²³ confestim igitur ut pervenit ad fratres nudaverunt eum tunica talari et polymita
²⁴ miseruntque in cisternam quae non habebat aquam
²⁵ et sedentes ut comederent panem viderunt viatores Ismahelitas venire de Galaad et camelos eorum portare aromata et resinam et stacten in Aegyptum
²⁶ dixit ergo Iudas fratribus suis quid nobis prodest si occiderimus fratrem nostrum et celaverimus sanguinem ipsius
²⁷ melius est ut vendatur Ismahelitis et manus nostrae non polluantur frater enim et caro nostra est adquieverunt fratres sermonibus eius
²⁸ et praetereuntibus Madianitis negotiatoribus extrahentes eum de cisterna vendiderunt Ismahelitis viginti argenteis qui duxerunt eum in Aegyptum
²⁹ reversusque Ruben ad cisternam non invenit puerum
³⁰ et scissis vestibus pergens ad fratres ait puer non conparet et ego quo ibo
³¹ tulerunt autem tunicam eius et in sanguinem hedi quem occiderant tinxerunt
³² mittentes qui ferrent ad patrem et dicerent hanc invenimus vide utrum tunica filii tui sit an non
³³ quam cum agnovisset pater ait tunica filii mei est fera pessima comedit eum bestia devoravit Ioseph
³⁴ scissisque vestibus indutus est cilicio lugens filium multo tempore
³⁵ congregatis autem cunctis liberis eius ut lenirent dolorem patris noluit consolationem recipere et ait descendam ad filium meum lugens in infernum et illo perseverante in fletu
³⁶ Madianei vendiderunt Ioseph in Aegypto Putiphar eunucho Pharaonis magistro militiae