Deutéronome 23.19
Vulgate

¹ Non accipiet homo uxorem patris sui nec revelabit operimentum ejus

Cas d’exclusion de l’assemblée

² non intrabit eunuchus adtritis vel amputatis testiculis et absciso veretro ecclesiam Domini
³ non ingredietur mamzer hoc est de scorto natus in ecclesiam Domini usque ad decimam generationem
⁴ Ammanites et Moabites etiam post decimam generationem non intrabunt ecclesiam Domini in aeternum
⁵ quia noluerunt vobis occurrere cum pane et aqua in via quando egressi estis de Aegypto et quia conduxerunt contra te Balaam filium Beor de Mesopotamiam Syriae ut malediceret tibi
⁶ et noluit Dominus Deus tuus audire Balaam vertitque maledictionem eius in benedictionem tuam eo quod diligeret te
⁷ non facies cum eis pacem nec quaeres eis bona cunctis diebus vitae tuae in sempiternum
⁸ non abominaberis Idumeum quia frater tuus est nec Aegyptium quia advena fuisti in terra eius
⁹ qui nati fuerint ex eis tertia generatione intrabunt ecclesiam Domini

Règles liées à la pureté

¹⁰ quando egressus fueris adversus hostes tuos in pugnam custodies te ab omni re mala
¹¹ si fuerit inter vos homo qui nocturno pollutus sit somnio egredietur extra castra
¹² et non revertetur priusquam ad vesperam lavetur aqua et post solis occasum regredietur in castra
¹³ habebis locum extra castra ad quem egrediaris ad requisita naturae
¹⁴ gerens paxillum in balteo cumque sederis fodies per circuitum et egesta humo operies
¹⁵ quo relevatus es Dominus enim Deus tuus ambulat in medio castrorum ut eruat te et tradat tibi inimicos tuos ut sint castra tua sancta et nihil in eis appareat foeditatis nec derelinquat te
¹⁶ non trades servum domino suo qui ad te confugerit
¹⁷ habitabit tecum in loco qui ei placuerit et in una urbium tuarum requiescet nec contristes eum
¹⁸ non erit meretrix de filiabus Israhel neque scortator de filiis Israhel
¹⁹ non offeres mercedem prostibuli nec pretium canis in domum Domini Dei tui quicquid illud est quod voverint quia abominatio est utrumque apud Dominum Deum tuum
²⁰ non fenerabis fratri tuo ad usuram pecuniam nec fruges nec quamlibet aliam rem
²¹ sed alieno fratri autem tuo absque usura id quod indiget commodabis ut benedicat tibi Dominus Deus tuus in omni opere tuo in terra ad quam ingredieris possidendam

Les vœux

²² cum voveris votum Domino Deo tuo non tardabis reddere quia requiret illud Dominus Deus tuus et si moratus fueris reputabit tibi in peccatum
²³ si nolueris polliceri absque peccato eris
²⁴ quod autem semel egressum est de labiis tuis observabis et facies sicut promisisti Domino Deo tuo et propria voluntate et ore tuo locutus es
²⁵ ingressus vineam proximi tui comede uvas quantum tibi placuerit foras autem ne efferas tecum
²⁶ si intraveris in segetem amici tui franges spicas et manu conteres falce autem non metes