Esaïe 1.17
Vulgate

Prophéties sur Israël

Péchés de Juda et punition

¹ visio Isaiae filii Amos quam vidit super Iudam et Hierusalem in diebus Oziae Ioatham Ahaz Ezechiae regum Iuda
² audite caeli et auribus percipe terra quoniam Dominus locutus est filios enutrivi et exaltavi ipsi autem spreverunt me
³ cognovit bos possessorem suum et asinus praesepe domini sui Israhel non cognovit populus meus non intellexit
⁴ vae genti peccatrici populo gravi iniquitate semini nequam filiis sceleratis dereliquerunt Dominum blasphemaverunt Sanctum Israhel abalienati sunt retrorsum
⁵ super quo percutiam vos ultra addentes praevaricationem omne caput languidum et omne cor maerens
⁶ a planta pedis usque ad verticem non est in eo sanitas vulnus et livor et plaga tumens non est circumligata nec curata medicamine neque fota oleo
⁷ terra vestra deserta civitates vestrae succensae igni regionem vestram coram vobis alieni devorant et desolabitur sicut in vastitate hostili
⁸ et derelinquetur filia Sion ut umbraculum in vinea et sicut tugurium in cucumerario sicut civitas quae vastatur
⁹ nisi Dominus exercituum reliquisset nobis semen quasi Sodoma fuissemus et quasi Gomorra similes essemus
¹⁰ audite verbum Domini principes Sodomorum percipite auribus legem Dei nostri populus Gomorrae
¹¹ quo mihi multitudinem victimarum vestrarum dicit Dominus plenus sum holocausta arietum et adipem pinguium et sanguinem vitulorum et agnorum et hircorum nolui
¹² cum veneritis ante conspectum meum quis quaesivit haec de manibus vestris ut ambularetis in atriis meis
¹³ ne adferatis ultra sacrificium frustra incensum abominatio est mihi neomeniam et sabbatum et festivitates alias non feram iniqui sunt coetus vestri
¹⁴ kalendas vestras et sollemnitates vestras odivit anima mea facta sunt mihi molesta laboravi sustinens
¹⁵ et cum extenderitis manus vestras avertam oculos meos a vobis et cum multiplicaveritis orationem non audiam manus vestrae sanguine plenae sunt
¹⁶ lavamini mundi estote auferte malum cogitationum vestrarum ab oculis meis quiescite agere perverse
¹⁷ discite benefacere quaerite iudicium subvenite oppresso iudicate pupillo defendite viduam
¹⁸ et venite et arguite me dicit Dominus si fuerint peccata vestra ut coccinum quasi nix dealbabuntur et si fuerint rubra quasi vermiculus velut lana erunt
¹⁹ si volueritis et audieritis bona terrae comedetis
²⁰ quod si nolueritis et me provocaveritis ad iracundiam gladius devorabit vos quia os Domini locutum est
²¹ quomodo facta est meretrix civitas fidelis plena iudicii iustitia habitavit in ea nunc autem homicidae
²² argentum tuum versum est in scoriam vinum tuum mixtum est aqua
²³ principes tui infideles socii furum omnes diligunt munera sequuntur retributiones pupillo non iudicant et causa viduae non ingreditur ad eos
²⁴ propter hoc ait Dominus exercituum Fortis Israhel heu consolabor super hostibus meis et vindicabor de inimicis meis
²⁵ et convertam manum meam ad te et excoquam ad purum scoriam tuam et auferam omne stagnum tuum
²⁶ et restituam iudices tuos ut fuerunt prius et consiliarios tuos sicut antiquitus post haec vocaberis civitas iusti urbs fidelis
²⁷ Sion in iudicio redimetur et reducent eam in iustitia
²⁸ et conteret scelestos et peccatores simul et qui dereliquerunt Dominum consumentur
²⁹ confundentur enim ab idolis quibus sacrificaverunt et erubescetis super hortis quos elegeratis
³⁰ cum fueritis velut quercus defluentibus foliis et velut hortus absque aqua
³¹ et erit fortitudo vestra ut favilla stuppae et opus vestrum quasi scintilla et succendetur utrumque simul et non erit qui extinguat