Exode 22.14
Vulgate

¹ si effringens fur domum sive suffodiens fuerit inventus et accepto vulnere mortuus fuerit percussor non erit reus sanguinis
² quod si orto sole hoc fecerit homicidium perpetravit et ipse morietur si non habuerit quod pro furto reddat venundabitur
³ si inventum fuerit apud eum quod furatus est vivens sive bos sive asinus sive ovis duplum restituet
⁴ si laeserit quispiam agrum vel vineam et dimiserit iumentum suum ut depascatur aliena quicquid optimum habuerit in agro suo vel in vinea pro damni aestimatione restituet
⁵ si egressus ignis invenerit spinas et conprehenderit acervos frugum sive stantes segetes in agris reddet damnum qui ignem succenderit
⁶ si quis commendaverit amico pecuniam aut vas in custodiam et ab eo qui susceperat furto ablata fuerint si invenitur fur duplum reddet
⁷ si latet dominus domus adplicabitur ad deos et iurabit quod non extenderit manum in rem proximi sui
⁸ ad perpetrandam fraudem tam in bove quam in asino et ove ac vestimento et quicquid damnum inferre potest ad deos utriusque causa perveniet et si illi iudicaverint duplum restituet proximo suo
⁹ si quis commendaverit proximo suo asinum bovem ovem et omne iumentum ad custodiam et mortuum fuerit aut debilitatum vel captum ab hostibus nullusque hoc viderit
¹⁰ iusiurandum erit in medio quod non extenderit manum ad rem proximi sui suscipietque dominus iuramentum et ille reddere non cogetur
¹¹ quod si furto ablatum fuerit restituet damnum domino
¹² si comestum a bestia deferet ad eum quod occisum est et non restituet
¹³ qui a proximo suo quicquam horum mutuo postularit et debilitatum aut mortuum fuerit domino non praesente reddere conpelletur
¹⁴ quod si inpraesentiarum fuit dominus non restituet maxime si conductum venerat pro mercede operis sui

Prescriptions diverses

¹⁵ si seduxerit quis virginem necdum desponsatam et dormierit cum ea dotabit eam et habebit uxorem
¹⁶ si pater virginis dare noluerit reddet pecuniam iuxta modum dotis quam virgines accipere consuerunt
¹⁷ maleficos non patieris vivere
¹⁸ qui coierit cum iumento morte moriatur
¹⁹ qui immolat diis occidetur praeter Domino soli
²⁰ advenam non contristabis neque adfliges eum advenae enim et ipsi fuistis in terra Aegypti
²¹ viduae et pupillo non nocebitis
²² si laeseritis eos vociferabuntur ad me et ego audiam clamorem eorum
²³ et indignabitur furor meus percutiamque vos gladio et erunt uxores vestrae viduae et filii vestri pupilli
²⁴ si pecuniam mutuam dederis populo meo pauperi qui habitat tecum non urgues eum quasi exactor nec usuris opprimes
²⁵ si pignus a proximo tuo acceperis vestimentum ante solis occasum redde ei
²⁶ ipsum enim est solum quo operitur indumentum carnis eius nec habet aliud in quo dormiat si clamaverit ad me exaudiam eum quia misericors sum
²⁷ diis non detrahes et principi populi tui non maledices
²⁸ decimas tuas et primitias non tardabis offerre primogenitum filiorum tuorum dabis mihi
²⁹ de bubus quoque et ovibus similiter facies septem diebus sit cum matre sua die octavo reddes illum mihi
³⁰ Viri sancti eritis mihi carnem quae a bestiis fuerit praegustata non comedetis sed projicietis canibus