Philippiens 4.2
Vulgate

¹ itaque fratres mei carissimi et desiderantissimi gaudium meum et corona mea sic state in Domino carissimi

Recommandations diverses

² Euhodiam rogo et Syntychen deprecor id ipsum sapere in Domino
³ etiam rogo et te germane conpar adiuva illas quae mecum laboraverunt in evangelio cum Clemente et ceteris adiutoribus meis quorum nomina sunt in libro vitae
⁴ gaudete in Domino semper iterum dico gaudete
⁵ modestia vestra nota sit omnibus hominibus Dominus prope
⁶ nihil solliciti sitis sed in omni oratione et obsecratione cum gratiarum actione petitiones vestrae innotescant apud Deum
⁷ et pax Dei quae exsuperat omnem sensum custodiat corda vestra et intellegentias vestras in Christo Iesu
⁸ de cetero fratres quaecumque sunt vera quaecumque pudica quaecumque iusta quaecumque sancta quaecumque amabilia quaecumque bonae famae si qua virtus si qua laus haec cogitate
⁹ quae et didicistis et accepistis et audistis et vidistis in me haec agite et Deus pacis erit vobiscum

Reconnaissance et salutations

¹⁰ gavisus sum autem in Domino vehementer quoniam tandem aliquando refloruistis pro me sentire sicut et sentiebatis occupati autem eratis
¹¹ non quasi propter penuriam dico ego enim didici in quibus sum sufficiens esse
¹² scio et humiliari scio et abundare ubique et in omnibus institutus sum et satiari et esurire et abundare et penuriam pati
¹³ omnia possum in eo qui me confortat
¹⁴ verumtamen bene fecistis communicantes tribulationi meae
¹⁵ scitis autem et vos Philippenses quod in principio evangelii quando profectus sum a Macedonia nulla mihi ecclesia communicavit in ratione dati et accepti nisi vos soli
¹⁶ quia et Thessalonicam et semel et bis in usum mihi misistis
¹⁷ non quia quaero datum sed requiro fructum abundantem in rationem vestram
¹⁸ habeo autem omnia et abundo repletus sum acceptis ab Epafrodito quae misistis odorem suavitatis hostiam acceptam placentem Deo
¹⁹ Deus autem meus impleat omne desiderium vestrum secundum divitias suas in gloria in Christo Iesu
²⁰ Deo autem et Patri nostro gloria in saecula saeculorum amen
²¹ salutate omnem sanctum in Christo Iesu salutant vos qui mecum sunt fratres
²² salutant vos omnes sancti maxime autem qui de Caesaris domo sunt
²³ gratia Domini Iesu Christi cum spiritu vestro amen