Esther 16.2
Vulgate

¹ rex magnus Artaxerxes ab India usque AEthiopiam, centum viginti septem provinciarum ducibus ac principibus qui nostrae jussioni obediunt salutem dicit
² multi bonitate principum et honore qui in eos collatus est abusi sunt in superbiam
³ et non solum subjectos regibus nituntur opprimere sed datam sibi gloriam non ferentes in ipsos qui dederunt moliuntur insidias
⁴ nec contenti sunt gratias non agere beneficiis et humanitatis in se jura violare sed Dei quoque cuncta cernentis arbitrantur se posse fugere sententiam
⁵ et in tantum vesaniae proruperunt ut eos qui credita sibi officia diligenter observant et ita cuncta agunt ut omnium laude digni sint mendaciorum cuniculis conentur subvertere
⁶ dum aures principum simplices et ex sua natura alios aestimantes callida fraude decipiunt
⁷ quae res et ex veteribus probatur historiis et ex his quæ geruntur quotidie quomodo malis quorumdam suggestionibus regum studia depraventur
⁸ unde providendum est paci omnium provinciarum
⁹ nec putare debetis si diversa jubeamus ex animi nostri venire levitate sed pro qualitate et necessitate temporum ut reipublicae poscit utilitas ferre sententiam
¹⁰ et ut manifestius quod dicimus intelligatis Aman filius Amadathi et animo et gente Macedo alienusque a Persarum sanguine et pietatem nostram sua crudelitate commaculans peregrinus a nobis susceptus est
¹¹ et tantam in se expertus humanitatem ut pater noster vocaretur et adoraretur ab omnibus post regem secundus
¹² qui in tantum arrogantiae tumorem sublatus est ut regno privare nos niteretur et spiritu
¹³ nam Mardochæum cujus fide et beneficiis vivimus et consortem regni nostri Esther cum omni gente sua novis quibusdam atque inauditis machinis expetivit in mortem
¹⁴ hoc cogitans ut illis interfectis insidiaretur nostrae solitudini et regnum Persarum transferret in Macedonas
¹⁵ nos autem a pessimo mortalium Judaeos neci destinatos in nulla penitus culpa reperimus sed e contrario justis utentes legibus
¹⁶ et filios altissimi et maximi semperque viventis Dei cujus beneficio et patribus nostris et nobis regnum est traditum et usque hodie custoditur
¹⁷ unde eas litteras quas sub nomine nostro ille direxerat sciatis esse irritas
¹⁸ pro quo scelere ante portas hujus urbis id est Susan et ipse qui machinatus est et omnis cognatio ejus pendet in patibulis non nobis, sed Deo reddente ei quod meruit
¹⁹ hoc autem edictum quod nunc mittimus in cunctis urbibus proponatur ut liceat Judaeis uti legibus suis
²⁰ quibus debetis esse adminiculo ut eos qui se ad necem eorum paraverant possint interficere tertiadecima die mensis duodecimi qui vocatur Adar
²¹ hanc enim diem Deus omnipotens moeroris et luctus eis vertit in gaudium
²² unde et vos inter ceteros festos dies hanc habetote diem et celebrate eam cum omni laetitia ut et in posterum cognoscatur
²³ omnes qui fideliter Persis obediunt dignam pro fide recipere mercedem qui autem insidiantur regno eorum perire pro scelere
²⁴ omnis autem provincia et civitas quae noluerit solemnitatis hujus esse particeps gladio et igne pereat et sic deleatur ut non solum hominibus sed etiam bestiis invia sit in sempiternum pro exemplo contemptus et inobedientiae