Esaïe 9.19
Vulgate

¹ populus qui ambulabat in tenebris vidit lucem magnam habitantibus in regione umbrae mortis lux orta est eis
² multiplicasti gentem non magnificasti laetitiam laetabuntur coram te sicut laetantur in messe sicut exultant quando dividunt spolia
³ iugum enim oneris eius et virgam umeri eius et sceptrum exactoris eius superasti sicut in die Madian
⁴ quia omnis violenta praedatio cum tumultu et vestimentum mixtum sanguine erit in conbustionem et cibus ignis
⁵ parvulus enim natus est nobis filius datus est nobis et factus est principatus super umerum eius et vocabitur nomen eius Admirabilis consiliarius Deus fortis Pater futuri saeculi Princeps pacis
⁶ multiplicabitur eius imperium et pacis non erit finis super solium David et super regnum eius ut confirmet illud et corroboret in iudicio et iustitia amodo et usque in sempiternum zelus Domini exercituum faciet hoc

Jugement d’Israël et de Juda

⁷ verbum misit Dominus in Iacob et cecidit in Israhel
⁸ et sciet populus omnis Ephraim et habitantes Samariam in superbia et magnitudine cordis dicentes
⁹ lateres ceciderunt sed quadris lapidibus aedificabimus sycomoros succiderunt sed cedros inmutabimus
¹⁰ et elevabit Dominus hostes Rasin super eum et inimicos eius in tumultum vertet
¹¹ Syriam ab oriente et Philisthim ab occidente et devorabunt Israhel toto ore in omnibus his non est aversus furor eius sed adhuc manus eius extenta
¹² et populus non est reversus ad percutientem se et Dominum exercituum non inquisierunt
¹³ et disperdet Dominus ab Israhel caput et caudam incurvantem et refrenantem die una
¹⁴ longevus et honorabilis ipse est caput et propheta docens mendacium ipse cauda est
¹⁵ et erunt qui beatificant populum istum seducentes et qui beatificantur praecipitati
¹⁶ propter hoc super adulescentulis eius non laetabitur Dominus et pupillorum eius et viduarum non miserebitur quia omnis hypocrita est et nequam et universum os locutum est stultitiam in omnibus his non est aversus furor eius sed adhuc manus eius extenta
¹⁷ succensa est enim quasi ignis impietas veprem et spinam vorabit et succendetur in densitate saltus et convolvetur superbia fumi
¹⁸ in ira Domini exercituum conturbata est terra et erit populus quasi esca ignis vir fratri suo non parcet
¹⁹ et declinabit ad dexteram et esuriet et comedet ad sinistram et non saturabitur unusquisque carnem brachii sui vorabit Manasses Ephraim et Ephraim Manassen simul ipsi contra Iudam
²⁰ in omnibus his non est aversus furor ejus sed adhuc manus ejus extenta