Galates 6.13
Vulgate

Mise en pratique de la vie nouvelle

¹ fratres et si praeoccupatus fuerit homo in aliquo delicto vos qui spiritales estis huiusmodi instruite in spiritu lenitatis considerans te ipsum ne et tu tempteris
² alter alterius onera portate et sic adimplebitis legem Christi
³ nam si quis existimat se aliquid esse cum sit nihil ipse se seducit
⁴ opus autem suum probet unusquisque et sic in semet ipso tantum gloriam habebit et non in altero
⁵ unusquisque enim onus suum portabit
⁶ communicet autem is qui catecizatur verbum ei qui se catecizat in omnibus bonis
⁷ nolite errare Deus non inridetur
⁸ quae enim seminaverit homo haec et metet quoniam qui seminat in carne sua de carne et metet corruptionem qui autem seminat in spiritu de spiritu metet vitam aeternam
⁹ bonum autem facientes non deficiamus tempore enim suo metemus non deficientes
¹⁰ ergo dum tempus habemus operemur bonum ad omnes maxime autem ad domesticos fidei

Conclusion et salutations

¹¹ videte qualibus litteris scripsi vobis mea manu
¹² quicumque volunt placere in carne hii cogunt vos circumcidi tantum ut crucis Christi persecutionem non patiantur
¹³ neque enim qui circumciduntur legem custodiunt sed volunt vos circumcidi ut in carne vestra glorientur
¹⁴ mihi autem absit gloriari nisi in cruce Domini nostri Iesu Christi per quem mihi mundus crucifixus est et ego mundo
¹⁵ in Christo enim Iesu neque circumcisio aliquid valet neque praeputium sed nova creatura
¹⁶ et quicumque hanc regulam secuti fuerint pax super illos et misericordia et super Israhel Dei
¹⁷ de cetero nemo mihi molestus sit ego enim stigmata Iesu in corpore meo porto
¹⁸ gratia Domini nostri Iesu Christi cum spiritu vestro fratres amen