1 Corinthiens 13.9
Vulgate

Les dons spirituels et l’amour

¹ si linguis hominum loquar et angelorum caritatem autem non habeam factus sum velut aes sonans aut cymbalum tinniens
² et si habuero prophetiam et noverim mysteria omnia et omnem scientiam et habuero omnem fidem ita ut montes transferam caritatem autem non habuero nihil sum
³ et si distribuero in cibos pauperum omnes facultates meas et si tradidero corpus meum ut ardeam caritatem autem non habuero nihil mihi prodest
⁴ caritas patiens est benigna est caritas non aemulatur non agit perperam non inflatur
⁵ non est ambitiosa non quaerit quae sua sunt non inritatur non cogitat malum
⁶ non gaudet super iniquitatem congaudet autem veritati
⁷ omnia suffert omnia credit omnia sperat omnia sustinet
⁸ caritas numquam excidit sive prophetiae evacuabuntur sive linguae cessabunt sive scientia destruetur
⁹ ex parte enim cognoscimus et ex parte prophetamus
¹⁰ cum autem venerit quod perfectum est evacuabitur quod ex parte est
¹¹ cum essem parvulus loquebar ut parvulus sapiebam ut parvulus cogitabam ut parvulus quando factus sum vir evacuavi quae erant parvuli
¹² videmus nunc per speculum in enigmate tunc autem facie ad faciem nunc cognosco ex parte tunc autem cognoscam sicut et cognitus sum
¹³ nunc autem manet fides spes caritas tria haec maior autem his est caritas